شروط الحملات الإعلانية
آخر تحديث: نوفمبر 2026
مهم: الحملات الإعلانية خدمة منفصلة عن «نظام التسويق المتكامل» الموجود على morshedworx.com. الضمان وسياسة الاسترداد الخاصة بالنظام المتكامل مش بتنطبق على الحملات.
1. الخدمة
- بتشتري حملة إعلانية واحدة على ميتا (فيسبوك وإنستجرام) أو تيك توك أو سناب شات أو جوجل (إعلانات الصور والبحث والخرائط) أو يوتيوب، بمبلغ ومدة بتحددهم انت قبل الدفع.
- احنا بنراجع إعلانك، ونجهّز الحملة، ونشغّلها من حساباتنا الإعلانية باسم صفحتك أو موقعك، ونتابعها ونبعتلك تقرير يومي. في ميتا الإعلان بيتنشر لوحده بعد الدفع والفحص، وفي باقي المنصات بنبعتلك معاينة توافق عليها قبل التشغيل.
- انت المسؤول عن الإعلان نفسه (الصور والفيديو والنص) وعن صحة العرض والمعلومات اللي فيه.
2. الفلوس
- المبلغ = ميزانية الإعلان (بتتصرف على منصة الإعلانات) + رسوم خدمة مرشد وركس + ضريبة المنصة لو بلدك فيها ضريبة، وكله ظاهر قبل الدفع.
- الدفع مرة واحدة بالبطاقة عن طريق Square (شركة الدفع)، وفي مصر ممكن تدفع كمان بتحويل إنستاباي أو محفظة بالجنيه. مفيش اشتراك ولا خصم متكرر، واحنا مابنشوفش رقم الكارت.
- تحويلات إنستاباي والمحافظ بتتراجع بإيدينا في مواعيد العمل (من الأحد للخميس، من 9 الصبح لـ 6 المسا بتوقيت القاهرة)، والحملة بتتجهّز بعد تأكيد التحويل.
- الحملة عمرها ما بتصرف أكتر من ميزانية الإعلان اللي دفعتها.
3. المدة والتوقف
- المدة بتبدأ من لحظة ما الحملة تشتغل فعلاً، أو من ميعاد البداية اللي حددته لو اخترت بداية مجدولة، مش من وقت الدفع.
- تقدر توقف الحملة مؤقتاً من حسابك وتشغّلها تاني، ووقت التوقف بيتضاف على آخر الحملة.
4. النتايج
- أي أرقام متوقعة تقديرية من حملات مشابهة، ومش وعد ولا ضمان. النتايج بتعتمد على نشاطك وعرضك وإعلانك والسوق وسرعة ردك على العملاء.
5. الاسترداد
- المبالغ المدفوعة غير قابلة للاسترداد.
- لو المنصة رفضت الإعلان أو النشاط، بنساعدك تعدّل الإعلان. وأي مبلغ بيتبقى من ميزانية الحملة لأي سبب (إيقاف الحملة، تخفيض الميزانية، أو إن الحملة ماقدرتش تشتغل) بينزل رصيد في حسابك وتقدر تستخدمه في حملة تانية.
6. الممنوع
- أي نشاط أو إعلان مخالف لسياسات منصة الإعلان (ميتا، تيك توك، سناب شات، جوجل) أو للقانون (قمار، عملات رقمية، أسلحة، تبغ، محتوى للكبار، وعود صحية أو مالية مضمونة…). من حقنا نرفض أو نوقف أي إعلان مخالف.
7. صفحتك وبياناتك
- صلاحية الشريك اللي بتديهالنا على صفحتك بنستخدمها للإعلان بس، وتقدر تشيلها في أي وقت بعد ما الحملة تخلص.
- بيانات العملاء المحتملين اللي بتيجي من الفورم ملكك، وبنعرضهالك في حسابك.
- بنبعتلك تحديثات حملتك على الواتساب، وعلى الإيميل لو أضفته، وتقدر توقف التقرير اليومي من إعدادات حسابك. التفاصيل في سياسة الخصوصية.
فاحص الإعلان المجاني
- الفاحص خدمة مجانية بحد أقصى لعدد الفحوصات في اليوم، ونقدر نعدّلها أو نوقفها في أي وقت.
- الدرجة والملاحظات والنصوص المقترحة بيطلّعها ذكاء اصطناعي. هي رأي استرشادي، مش ضمان لنتيجة الحملة ولا لموافقة المنصة على الإعلان، والقرار في الآخر قرارك.
- ارفع بس محتوى ليك حق تستخدمه، ومترفعش محتوى مخالف للقانون أو فيه بيانات ناس تانية من غير إذنهم.
- المحتوى اللي بترفعه بيفضل ملكك. بتدّينا إذن نحلله ونخزّنه زي ما سياسة الخصوصية بتوضّح.
- لو طلبت التقرير على واتساب فإنت موافق إننا نبعتهولك ونتواصل معاك بخصوصه.
8. التواصل
أي سؤال: admin@morshedworx.com أو واتساب.
